又大跌市了

近日恒指兩次單日跌幅近千點。

第一次係8月5日，美國安然步過8月2日債務上限問題後，美股大跌500點的翌日。
第二次係8月9日，美國國債降級後的第一個交易日。

一開市就跌成千五千六點既一幕真的令人膽顫心驚，又興奮萬分，因為市場終於有較平的貨賣了。
我又記起一個投資名言：「超級市場特價丫，點解唔買多Ｄ？」

今天的起心肝為投資組合換馬，亦正式為自己之前犯的錯誤埋單，重新出發。

錯誤係先前用Margin抽返黎既IPO無放到，一直擺係度。結果係：
一上市有錢賺　－＞　賺多Ｄ先放　－＞　本來有錢賺，打個和唔甘心　－＞　開始蝕，又等浮返上水面　－＞　股價每況愈下　－＞　心痛無眼睇，開始專注其他方面　－＞　更加少打理　－＞　到換馬日時才驚然發覺無左成半...(Data)

這裏需要多兩句投資名言：
「Never Let a Profit Turn into Loss」(保本，止賺)
「你不理財，財不理你」（持間，投入）

蝕了本不捨得也不能，唯有以換貨之名全數賣出，「回到起點，重頭上路」。
承認錯誤後，心理負擔細了，人也光明點！

換入的以大藍籌為主：　（按比例排列）

２３８８中銀香港@19.08
３８１８中國動向@1.51 ＊
２６２８中國人壽@21.15
２８８８渣打集團@181.0

中銀香港我對其香港離岸人民幣業務及派發高息有興趣很久，上一次睇佢係阿爺正式宣佈推出（某個）人民幣給中銀香港，令其由$19蚊一直標上去$24+，由於在$20-21附近未能買入，放了鴿子，所以現在要復仇。中銀香港上年共派息$0.972，買入價息率為5.09%。

中國動向係我對放走波士登的補償，在海嘯中放走了$0.5 和 $1.0 的波士登，其後曾標升至 ~$4 。兩者都係市況好時上市，備有大量現金，網友 ckm001 及 味皇 等分析中國動向中的每股現金己值 $1.27，現價輸面有限。中國動向上年共派息$0.2112，買入價息率為14.0%。

中國人壽係話左好耐又未買入過的股份，海嘯期間(Data)，當時仍以$28為掙扎點。參考 市場先生 計得2010年底人壽內涵值EV=$12.66，買入價P/EV為1.67， 林森池 又說EV<=2係非常好的購入時機，所以就買左囉。中國人壽上年共派息$0.47978，買入價息率為2.27%。

渣打不嬲都係我的愛股，我亦長期認為渣打的大東南亞戰略會戰勝匯豐。很久前看 價值投資者日記 的 Freeman 亦有一樣的說法。持有渣打亦間接令我的組合間有印度的業務，可以在人口將會超越中國的印度踏入人口紅利期時滔一點油水。（說其在的是：我也想不到香港還有甚麼印度有關的上市公司）。增持的主要原因係$180的心理關口和先前有次交唔切以股代息表格，以至收左股息唔係收股票。渣打上年共派息USD0.7 (~$5.46)，買入價息率為3.02%。

－－－－－－－－－－－－－－－－－－－－－－－－－－－－－－－－－
參考：
05/08/2011 17:51
《小傳日記》冧市的一天！
　　《小傳日記》花旗國大冧市，一夜之間冇咗５００幾點，冇計啦，花旗國可能再走入衰退，
意大利同西班牙債務問題危危乎，兩單負面新聞圍攻之下，缸友雞飛狗走亦合情合理。果真應驗
咗小傳噚日條題「經濟疲弱，走為上著」！
　　香江魚缸今日開市上演嗰場「鳥獸散」認真震撼人心，睇怕唔少缸友見到開市個達９４５點
嘅裂口，個心都裂開一半，之後仲慘跌超過一千點！午後回來仲冇眼睇，一度大撻逾１２００點
。最後恆指全日震走咗９３８點收２０９４６；國貨指數就插低４５８點造１１４３４。
　　冧市的一天，港滙曾經失守７﹒８水平，唔通資金由香江悄悄的溜走？睇埋成交量可能有啟
示，今日交投勁活躍，成交金額有成大拿拿１２４８億銀，係今年最高！

09/08/2011 17:56
《小傳日記》風高浪又急，好友心更實！
　　《小傳日記》花旗國噚晚（８日）迎來標普調低信貸評級之後嘅第一個交易日，股市由頭沽
到落尾，大瀉超過６００點散場，仲再震散埋全球股市。香江魚缸見到美國咁嘅樣，今朝（９日
）一開市就已經裂口插低逾１０００點，莫講話兩萬關，連萬九關口亦失守，低見１８８６８。
　　大家恐慌未過，祖國市有番少少勢頭，缸友即時一齊起哄入市搶貨補倉；魚缸由低位反彈超
過１０００點，仲重上２００００大關，不過歐洲一開市魚缸又再軟晒腳，收市前再插過。恆指
埋單唔見５﹒７％或１１５９點，報１９３３０；國貨指數跌６﹒２％或６８７點，報
１０４２６。「大時代」之下嘅成交亦都非常驚人，今日錄得１１６９億銀。